...

Нимгэн даашинзаа тайлж
Нөмгөн гунигаа хөөчихөөд
Нил хар шөнөөр
Чиний дэргэд очъё
Чийг даасан уруулаар
Нүдэн дээр чинь үнсэж
Чихрээс ч амттай биеэрээ
Зүрхийг чинь дайлъя!

Би эрх чөлөөтэй бүсгүй

Галзуурчихсан мэт шөнийг хэн нэгэнд бэлэглэчихээд
Гэртээ очихдоо айх зүйлгүй
Ганихарсан зүрхээ хэн нэгэнд өгчихөөд эмээх явдалгүй
Гэмгүйхэн нэгэнтэй санаандгүй сээтэгнэчихээд эмзэглэх хэрэггүй
Гэртээ би хувцасгүй байхаасаа хэнээс ч ичихгүй
Би эрх чөлөөтэй бүсгүй
Эрхэмсэг харцаа дээш өргөхдөө аальгүйтлээ нуудаггүй
Эрээгүй харцнаас нүд дальдчиж үзээгүй
Даруухан хувцасласан ч энгэрийнхээ товчийг хэзээ ч товчилдоггүй
Давгүй залууст хайр зарлахаас буцдаггүй
Би - Эрх чөлөөтэй бүсгүй
                                            Г.Номин

Бардам бүсгүй

Зөвхөн өөртөө зориулж нэрийг минь хэл
Зөвхөн өөртөө зориулж өврийг минь сана
Хэзээ нэгэн цагт чинийх байсан 
Хэлбэрлэг төрх, будаггүй уруулд 
Унаж үхдэгтэйгээ эвлэр!
Хаврын салхи мэт араншинг минь 
Халааснаасаа гээсэн зурвас мэт
Хаяж чадаагүйдээ гунигла!
Надаас бусад нь чамд хэн байсныг 
Надаас эрхэмсгийг мэдэх үгүйгээ
Нэрэлхэх юмгүй цэгнэ!
Навчис унах цагаар
Намайг зорьж халамцуухан ир
Тэнэглээд ч гэсэн зоригло
Тэгээд хэрхэхийг минь хүлээ!